කැකිරිඕබඩ ජලාශ ව්‍යාපෘතිය

වලස්මුල්ල ප්‍රාදේශීය ලේකම් කොට්ඨාශයේ රම්මල කඳු වැටියෙන් ආරම්භ වී තංගල්ල ප්‍රාදේශීය ලේකම් කොට්ඨාශයෙන් මුහුදට වැටෙන කිරම ඔය වාර්ෂිකව අක්කර අඩි 29000 ක පමණ ජල ප්‍රමාණයක් කරදිය සමග මුසු කරයි. කිරම ඔය හරස් කොට අක්කර අඩි 1130 ක පමණ වූ කිරම වැව (වරාපිටිය වැව) වරාපිටිය ප්‍රදේශයේ ඉදි කර ඇත. කිරම ඔය හරස් කර අමුණු 19 ක් සකස් කොට ඇති අතර ඒ යට‍ෙත් වලස්මුල්ල, ඕකේවෙල, බෙලිඅත්ත සහ තංගල්ල ප්‍රාදේශීය ලේකම් කොට්ඨාශයන්හි කුඹුරු අක්කර 5535 ක් පමණ යල, මහ දෙකන්නයෙහිම වගා කරනු ලැබේ. එමෙන්ම කිරම, වලස්මුල්ල සහ තංගල්ල යන නගර සඳහා පානීය ජලය ලබා දීමද කිරම ඔය මගින් සිදු කරනු ලැබේ.

එහෙත් වර්ෂිකව ඇතැම් කාල සීමාවන් තුල ,ඉහත ප්‍රාදේශීය ලේකම් කොට්ඨාශයන්හි පහත ගැටළු පැන නගී.
01. ඉහත කී අමුණු 19 න් වගා කරනු ලබන වගා බිම් සඳහා වියළි කාලයේ දී ජලය සැපයීම අසීරු වීම.
02. වියළි කාලගුණික තත්ත්වයන් යට‍ෙත් කිරම, වලස්මුල්ල සහ තංගල්ල නගර වල‍ට පානීය ජලය ලබ‍ා දීම දුෂ්කර වීම.
03. අධික වර්ෂා සහිත කාල සීමාවන් තුල බෙලිඅත්ත සහ විශේෂයෙන් තංගල්ල ප්‍රදේශ ආශ්‍රිතව ඇති වන ගංවතුර තත්ත්වය පාලනය කිරීම.

මෙම ගැටළු වලට විසඳුමක් ලෙස කිරම ඔයේ අමුණු 19 ට ඉහලින් ජලය ගබඩා කර ගැනීම සඳහා ජලාශයක් ඉදි කිරීමේ වැදගත් බව බොහෝ දෙනෙකුගේ අදහස විය.මේ සඳහා කිරම ඔයට සම්බන්ධ ජල ප්‍රවාහයක් වන, කණුමුල්දෙනිය රක්ෂිතයෙන් ආරම්භ වන කැකිරිඔය හරස් කොට ජලාශයක් ඉදි කිරීම පිළිබඳව අදහස දශක දෙකකට පමණ පෙර ඉදිරිපත් වුවද විවිධ හේතූන් නිසා එම අදහස ක්‍රියාත්මක කිරීම 2004 වර්ෂය පමණ දක්වා ප්‍රමාද වී ඇත.

ජලාශයේ ඉදිකිරීම් ආරම්භ කිරීම සඳහා බාධකයක්ව පැවති ඉඩම් අත්පත් කර ගැනීමේ කටයුතු කඩිනම් කිරීමට අවශ්‍ය විධි විධාන යෙදීම නිසා කැකිරිඕබඩ ජලාශය ඉදි කිරීමේ මූලික කටයුතු 2004 වර්ෂයේ දී ආරම්භ කිරීමට හැකියාව ලැබිණි.

ජලාශයේ පිහිටීම


ශ්‍රී ලංකාවේ පිහිටීම පිළිබඳව මෑතකදී ස්ථාපනය කරන ලද නව අක්ෂ පද්ධතියට අනුව උතුරට කි.මී.188000 සහ දකුණට කි.මී.111000 තුල ස්ථාගත වී ඇත. හම්බන්තොට දිස්ත්‍රික්කයේ, වලස්මුල්ල ප්‍ර‍ාදේශීය ලේකම් කොට්ඨාශයේ, කැකිරිඕබඩ, අගලබඩ, වෙළඳගොඩ, බටගස්ස සහ පිස්සුබැද්ද යන ග්‍රාම නිළධාරී වසම් තුල ජලාශය පිහිටා ඇත.

ජලාශයට ලඟා විය හැකි මාර්ග

01. හම්බන්තොට, තංගල්ල සිට වීරකැටිය, වලස්මුල්ල, කිරම හරහා
02. ඇඹිලිපිටිය සිට මිද්දෙණිය, කටුවන, කිරම හරහා

ජලාශය පිළිබඳ ‍‍ෙතාරතුරු

ජල පෝෂක ප්‍රදේශය - වර්ග කි.මී. 87
එම ප්‍රදේශයේ වාර්ෂික වර්ෂාපතනය - මිලි මීටර් 2000
වැව් බැම්මේ දිග - මීටර් 375
මුදුන මට්ටමේ පළල - මීටර් 6.5
බැම්මෙහි උපරිම උස - මීටර් 30
මුහුදු මට්ටම‍ට සාපේක්ෂව බැම්මේ
මුදුන මට්ටමෙහි උස - මීටර් 996
ජලාශයේ ජල ධාරිතාවය - ඝන මීටර් මිලියන 27
පිටවාන සහ සොරොව්ව - මෝනිං ග්ලෝරි වර්ගයේ


ඉදිකිරීම් කටයුතු සඳහා මූල්‍ය පහසුකම්

ව්‍යාපෘතිය සඳහා ඇස්තමේන්තුගත මුදල රුපියල් මිලියන 273 ක් වන අතර ඉන් 75% ක්, ජපාන අන්තර් සහයෝගීතා බැංකුවෙහි, කුඩා පරිමාණ යටිතල පහසුකම් පුනරුත්ථාපනය සහ වැඩි දියුණු කිරීමේ ව්‍යාපෘතිය යට‍ෙත් ලබා දීමට නියමිත අතර, ඉතිරි 25% ශ්‍රී ලංකා රජයෙහි ඒකාබද්ධ අරමුදලින් දැරීම‍ට නියමිතය.

ජලාශය සඳහා අවශ්‍ය ඉඩම්

ජලාශය සඳහා අවශ්‍ය වන ඉඩම් කැබලි 283 ක් පමණ මේ වන විට වලස්මුල්ල ප්‍රාදේශීය ලේකම් කාර්යාලය විසින් අත්පත් කරගෙන කැකිරිඕබඩ වාරිමාර්ග කාර්යාලය වෙත පවරා දී ඇත. ඉඩම් අත්පත් කර ගැනීම නිසා නිවාස අහිමි වන පවුල් 54 ක් සඳහා හම්බන්තොට සහ අම්බලන්තොට ප්‍රදේශ වලින් පදිංචිය සඳහා නිවාස ලබා දී ඇති අතර එයට අමතරව සූරියවැව, මයුරපුර, මහවැලි සංවර්ධන කළාපයෙන් වගාව සඳහා ගොඩ මඩ ඉඩම් අක්කර 2 ¼ බැගින් ලබා දී ඇත.
එමෙන්ම ඉඩම් අහිමි වන සියළුම පවුල් සඳහා වන්දි ගෙවීම් කටයුතු මේ වන විට ආරම්භ කර ඇති අතර නිරවුල් අයිතිය තහවුරු කල ඉඩම්හිමියන් සඳහා 50% ක වන්දි මුදල් ගෙවා නිම කොට ඇත.
රජයට අයත් ඉඩම් වල අනවසරයෙන් වගා කටයුතු සිදු කල පුද්ගලයන්ට ද විශේෂ කැබිනට් අනුමැතියක් යට‍ෙත් වන්දි ලබා දීමට කටයුතු කොට ඇත.

ජලාශයේ ඉදිකිරීම් කටයුතු සිදු කිරීම

කෘෂිකර්ම, පශු සම්පත්, ඉඩම් හා වාර්මාර්ග අමාත්‍යාංශය යට‍ෙත්, වාරිමාර්ග දෙපාර්තමේන්තුව මගින් ඉදි කිරීම් කටයුතු සිදු කරනු ලබයි.
ඉදි කිරීම් කටයුතු 2009 වසර අවසන් වන විට නිම කිරීමට සැලසුම් කොට ඇත.

ජලාශය ඉදි කිරීමෙන් ලැබෙන ප්‍රතිලාභ

01. කිරම ඔයෙහි ජලය සෘජුවම උපයෝගී කර ගනිමින් වගා කටයුතු කරන ගොවි පවුල් සංඛ්‍යාව 3500 කට ආසන්න වේ. ජලාශය ඉදි කිරීමෙන් පසුව කිරම ඔය නිම්නයේ වගා බිම් සඳහා යල, මහ දෙකන්නයෙහිම නොඅඩුව පලය සැපයීමට හැකි වනු ඇත. මෙමගින් ගොවි ජනතාවගේ ජීවන තත්ත්වය නගා සිටුවීමට හැකියාව ලැබේ.
02. කිරම, වලස්මුල්ල, ඕකේවෙල, බෙලිඅත්ත සහ තංගල්ල නගර සඳහා පානීය ජල පහසුකම් ලබා දීමට හැකියාව ලැබීම.
03. ධීවර කර්මාන්තය වැනි විකල්ප ආදායම් මාර්ග ජනතාව වෙත සමීප කිරීම.
04. ජෛව විවිධත්වයෙන් යුතු සමබර සහ යහපත් පරිසරයක් ප්‍රදේශය තුල ගොඩ නැගීම.

ජීවනෝපාය මාර්ග සංවර්ධනය කෙරේ......

සමෘද්ධි ජාතික සවිය වැඩ සටහන යටතේ, වලස්මුල්ල ප්‍රාදේශීය ලේකම් කොට්ඨාශය තුළ ජීවනෝපාය මාර්ග සංවර්ධනය සඳහා ව්‍යාපෘති ක්‍රියාත්මක කිරීම මේ දිනවල සිදු කෙරේ.
ඒ අනුව සමෘද්ධි ප්‍රතිලාභී පවුල් 156 ක ජීවනෝපාය මාර්ග නැංවීම සඳහා අවශ්‍ය උපකරණ මෙන්ම කෘෂිකාර්මික පැල වර්ග 50% ක ආධාර පදනම මත ලබා දීමට නියමිතව ඇත.
මෙම වැඩ සටහනෙහි ප්‍රථම පියවර ලෙස පවුල් 48 ක් සඳහා දියර ඉසින යන්ත්‍ර ලබාදීම 2009.07.15 දින කාර්යාලයීය පරිශ්‍රයේදී සිදු කරන ලදි.
සමෘද්ධි මූලස්ථාන කළමනාකාරීණී ඒ.එච්. මේධාවිනී මහත්මියගේ සහ සමෘද්ධි ව්‍යාපෘති කළමනාකාරීණී අංගනී වීරරත්න මහත්මියගේ අධීක්ෂණය යටතේ මෙම ව්‍යාපෘති තෝරාගැනීම සිදු කරන ලදි.

රට නැඟුමට දෑත දෙන්න....

තිස් වසරක් පුරා පැවති ත්‍රස්තවාදී යුද්ධය අවසන් ‍කරමින්, ඓතිහාසික ජයග්‍රහණයක් කරා අප රට මෙහෙය වූ, අතිගරු ජනාධිපතිතුමන් විසින් ඉදිරියේදී සිදු කිරීමට බලාපොරොත්තු වන සංවර්ධන සංග්‍රාමයේදී රාජ්‍ය නිළධාරීන් තම දායකත්වය ලබා දිය යුත්තේ කෙසේද යන්න පැහැදිළි කිරීම සඳහා,රජයේ නිළධාරීන් සඳහා වන දැනුවත් කිරීම් මාලාවක ආරම්භක වැඩ සටහන ජනාධිපති ලේකම් ලලිත් වීරතුංග මහතා‍ ගේ ප්‍රධානත්වයෙන් පවත්වන ලදි.
හම්බන්තොට, සිරිබෝපුර, සිංගප්පුරු ප්‍රජා සත්කාරක මධ්‍යස්ථානයේදී පැවති මෙම වැඩ සටහනේදී, මහජනතාව වෙනුවෙන් සහ සංවර්ධනය වෙනුවෙන් රාජ්‍ය නිළධාරීන් තම දායකත්වය උපරිම අයුරින් ලබා දිය යුතු බව ලලිත් වීරතුංග මහතා අවධාරණය කරන ලදි.රාජ්‍ය පරිපාලන අමාත්‍යාංශයේ ලේකම් ඩී. දිසානායක මහතා ද මෙහිදී රැස්ව සිටි නිළධාරීන් ඇමතීය.
හම්බන්තොට දිස්ත්‍රික්කයේ සියළුම දෙපාර්තමේන්තු සහ රාජ්‍ය ආයතන වල ප්‍රධානීන්ද, දිස්ත්‍රික් ලේකම්. අතිරේක දිස්ත්‍රික් ලේකම් ඇතුළු දිස්ත්‍රික් ලේකම් කාර්යාලයේ සියළුම මාණ්ඩලික නිළධාරීන් ද, ප්‍රාදේශීය ලේකම් වරුන්, සහකාර ප්‍රාදේශීය ලේකම්වරුන් ඇතුළු ප්‍රාදේශීය ලේකම් කාර්යාල වල මාණ්ඩලික නිළධාරීන්ද සහභාගී විය.

ප්‍රජා මූලික ආබාධිත පුනරුත්ථාපනය ගැන දැනුවත් කිරීමක්...

සමාජසේවා හා සමාජ සුභසාධන අමාත්‍යාංශය මගින් සිදු කරනු ලබන ප්‍රජා මූලික ආබාධිත පුනරුත්ථාපන වැඩ සටහන (CBR) පිළිබඳව රාජ්‍ය නිළධාරීන් දැනුවත් කිරීමේ වැඩ මුළුවක් 2009.07.09 දින, හම්බන්තොට දිස්ත්‍රික් ලේකම්තුමාගේ ප්‍රධානත්වයෙන් පවත්වනු ලැබිණි.

සමාජසේවා හා සමාජ සුභසාධන අමාත්‍යාංශයේ ජාතික සම්පත්දායක එස්. කොඩිකාර මහතා විසින් "ප්‍රජා මූලික පුනරුත්ථාපනය තුළින් ජාතික සංවර්ධනයට ආබාධිතතාවය අන්තර්කරණය" පිළිබඳව රාජ්‍ය නිළධාරීන් දැනුවත් කරන ලදි.ආබාධ සහිත පුද්ගලයින්ගේ සහ ඔවුන්ගේ පවුල්වල අයගේ පූර්ණ සහභාගීත්වය මත ප්‍රජා මූලික පුනරුත්ථාපනය ගොඩ නැගීම නැගීම සහ තීරණ ගැනීමේදී ඔවුන්ගේ නියෝජනය ලබා ගන්නා ආකාරය මෙම වැඩ සටහන තුලින් පැහැදිලි කරන ලදි.

මෙම වැඩ සටහන සඳහා ක්‍රියාකාරීව දායක වන හම්බන්තොට දිස්ත්‍රික්කයේ ප්‍රාදේශීය ලේකම්වරුන්, සහකාර ප්‍රාදේශීය ලේකම්වරුන්, සෞඛ්‍ය වෛද්‍ය අධිකාරීවරුන් සහ අධ්‍යාපන නිළධාරීන් මෙහිදී දැනුවත් කරනු ලැබීය.

කාර්යාල නිළධාරීන්ට නව නිළ ඇඳුමක්.....

වලස්මුල්ල ප්‍රාදේශීය ලේකම් කාර්යාලයීය නිළධාරීන් සඳහා නව නිළ ඇඳුමක් හඳුන්වා දීම 2009.07.08 දින සිදු කරන ලදි.

කාය්‍යාලයීය නිළධාරීන්ගේ එකමුතුකම වර්ධනය වන ආකාරයෙන් යුත් නව ආරක් ගත් මෙම නිළ ඇඳුම හඳුන්වාදීම රාජ්‍ය සේවාවේ ගුණාත්මකභාවය වර්ධනය වන අයුරින් සිදු කරන ලදි.

නව නිළ ඇඳුම සහිතව,බදාදා උදෑසන රැස්වීමේදී රාජ්‍ය සේවයේ ප්‍රතිඥාව ලබා දීමෙන් අනතුරුව එදින කාර්යාලයීය කටයුතු ආරම්භ කරන ලදි.

හම්බන්තොට දිස්ත්‍රික්කයේ ප්‍රථම තේ කම්හල ජනපති අතින් ජනතා අයිතියට...

හම්බන්තොට දිස්ත්‍රික්කය සඳහා ඇති එකම තේ කම්හල වන, වලස්මුල්ල ප්‍රාදේශීය ලේකම් කොට්ඨාශයේ දෙහිගහහේන ග්‍රාම නිළධාරී වසමේ පිහිටි 2009.06.27 දින අතිගරු ජනාධිපති මහින්ද රාජපක්ෂ මැතිතුමන් අතින් ජනතා අයිතියට පවරා දෙනු ලැබීය.

1989 භීෂණ සමයේ ගිණි ගැනීමෙන් විනාශයට පත්ව තිබූ "හඳුගල තේ කම්හල" නැවතත් දෙණියාය යෝල්ටා තේ කර්මාන්තශාලාව අධිපති කමල් මහේෂ් රණවීර මහතා විසින් අළුත්වැඩියා කර ආරම්භ කරනු ලැබූ අතර, මේ සඳහා යටිතල පහසුකම් සංවර්ධනය දක්ෂිණ සංවර්ධන අධිකාරියේ අනුග්‍රහය යටතේ සිදු කරනු ලැබීය.ඉඩම් පවරා දීම වලස්මුල්ල ප්‍රාදේශීය ලේකම් කාර්යාලය විසින් සිදු කරන ලදි.

මෙම උත්සවය සඳහා වැවිලි කර්මාන්ත ඇමති දි.මු. ජයරත්න මහතා ඇතුළු හම්බන්තොට දිස්ත්‍රික්කයේ සියළුම මැති ඇමතිතුමන්ලා සහ රජයේ නිළධාරීන් සහභාගී විය.

අනන්‍යතාවය සැමටම.....

වලස්මුල්ල ප්‍රාදේශීය ලේකම් කොට්ඨාශයේ, පුරවැසි හැඳුනුම්පත් නොමැති පුද්ගලයින් හට කඩිනමින් පුරවැසි හැඳුනුම්පත් ලබා දීම සඳහා ජංගම සේවාවන් පැවැත්වීම 2009.07.04 දින සිදු කරන ලදි.
පුද්ගලයින් ලියාපදිංචි කිරීමේ දෙපාර්තමේන්තුවේ සහභාගීත්වය ඇතිව සිදු කරනු ලැබූ මෙම ජංගම සේවාවන් ඇත්පිටිය ශ්‍රී විජයාරාම විහාරස්ථානයේදී සහ සිත්තම්ගල්ලෙන පුරාණ විහාරස්ථානයේදී සිදු කරනු ලැබීය.

ගමින් ගමට" ජංගම සේවාව පහල ඕබඩ විහාරස්ථානයේදී...

වලස්මුල්ල ප්‍රාදේශීය ලේකම් කාර්යාලය විසින් සංවිධානය කරනු ලබන "ගමින් ගමට" තවත් ජංගම සේවාවක් පසුගියදා පහල ඕබඩ විහාරස්ථානයේදී පවත්වනු ලැබීය.

කාර්යාලයේ නිළධාරීන් ග්‍රාම නිළධාරී වසම් වලට ගොස් මහජනතාවගේ ගැටළු විසඳීම මෙහිදී සිදු කරනු ලබයි.

ක්‍රිකට් තරඟාවලියක්.....

හදිසියේ අප අතරින් වියෝ වූ වලස්මුල්ල හිටපු ප්‍රාදේශීය ලේකම් ඩබ් . ජේ. ආනන්ද මහතා අනුස්මරණ කුසලාන ක්‍රිකට් තරඟාවලියක්, වලස්මුල්ල ප්‍රාදේශීය ලේකම් කාර්යාලයීය නිළධාරීන් අතර පසුගියදා පවත්වන ලදි.

කාර්යාලයීය නිළධාරීන් එක් කණ්ඩායමක් ලෙසත්, කාර්යාලයට අනුබද්ධිත ග්‍රාම නිළධාරීන් සහ සමෘද්ධි සංවර්ධන නිළධාරීන්ගෙන් සැදුම්ලත් වලස්මුල්ල,වරාපිටිය,හොරේවෙල සහ කැප්පෙටියාව කණ්ඩායම් සහ ග්‍රාම නිළධාරී ඒකාබද්ධ කණ්ඩායම් අතර පැවති ක්‍රිකට් තරඝාවලියේ ශූරතාවය කාර්යාල නිළධාරී කණ්ඩායමටද අනු ශූරතාවය ග්‍රාම නිළධාරී ඒකාබද්ධ කණ්ඩායමටද හිමි විය.

ජයග්‍රාහී කණ්ඩායමට ඩබ්.ජේ. ආනන්ද අනුස්මණ කුසලානය ප්‍රදානය කරන ලදි.

අන්තර් ක්‍රීඩා සමාජ ක්‍රීඩා උළෙල

වලස්මුල්ල ප්‍රාදේශීය ලේකම් කොට්ඨාශයීය අන්තර් ක්‍රීඩා සමාජ ක්‍රීඩා උළෙල දකුණු පළාත්ක්‍රීඩා,ග්‍රාමසංවර්ධන නිවාස,යෞව්වන කටයුතු පිළිබඳ ගරු අමාත්‍ය වී.කේ.ඉන්දික මැතිතුමාගේ ප්‍රධනත්වයෙන් හොරේවෙල මහා විද්‍යාලයීය ක්‍රීඩාංගනයේදී පසුගියදා පවත්වන ලදි.

ගරු දකුණු පළාත් සභා අමාත්‍යතුමාගේ ප්‍රතිපාදන මගින් ක්‍රීඩා සමාජ සඳහා ක්‍රීඩා භාණ්ඩ ලබා දීමද මෙදින සිදු කරන ලදි.